Европа парламенти 13 июль куни Қирғизистонда инсон ҳуқуқлари, матбуот ва сўз эркинлигига босим кўрсатилаётгани масаласини муҳокама қилди. Бу борада қабул қилинган резолюцияни йиғилишда иштирок этган 469 депутатдан 320 нафари маъқуллади.
Резолюцияда “2022 йилнинг январидан бошлаб Қирғизистонда инсон ҳуқуқлари ва сўз эркинлиги вазияти кескин ёмонлашгани” қайд этилган.
Европа парламенти Озодлик радиоси қирғиз хизматининг Бишкек бюросини ёпиш ҳаракатлари, Kaktus.media нашрига нисбатан жиноят иши қўзғатилиши, ҳукумат тепасидагиларни танқид қилгани учун журналист Болот Темиров Қирғизистондан Россияга бадарға қилингани каби ҳолатлар сўз эркинлиги ҳолатини кескин ёмонлаштирганини қайд этганлар.
Шунингдек, резолюцияда Қирғизистон ҳукуматини мамлакатнинг халқаро мажбуриятларига зид келадиган қонун лойиҳаларини парламентда муҳокама қилинишини тўхтатишга чақирди. Бундай лойиҳалар сифатида ёлғон ахборот, болаларни зарарли маълумотлардан ҳимоя қилиш, хорижий агентлар ва ОАВ тўғрисидаги қонунлар тилга олинган.
Қирғизистон Ташқи ишлар вазирлиги Европа парламентининг резолюциясига муносабат билдирар экан, ҳужжат “шошма-шошарлик билан қабул қилинганидан афсус билдирди”. ТИВ баёнотида айтилишича, Қирғизистонда сўз ва матбуот эркинлиги, инсон ҳуқуқларига амал қилинмоқда ва бу соҳаларни ривожлантиришга алоҳида эътибор қаратилмоқда. Баёнотда, шунингдек, Озодлик радиоси қирғиз хизматини ёпиш тўғрисидаги қарор бекор қилингани ҳам таъкидланади.
Бишкек шаҳар суди 12 июль куни Ленин тумани судининг Озодликнинг қирғиз хизмати -“Азаттиқ Медиа”ни оммавий ахборот воситаси ўлароқ ёпиш ҳақидаги қарорини бекор қилиб, Озодлик билан Маданият вазирлиги ўртасидаги муросавий келишувни тасдиқлаганди.
Ўтган йил 26 октябрида Маданият вазирлиги “Настояшчее время. Азия” дастуридан ўрин олган қирғиз-тожик чегарасидаги можаро ҳақидаги лавҳа туфайли “Азаттиқ Медиа” сайтларини блокировка қилиш тўғрисида қарор чиқарган. Вазирлик бу чора блокировка қарорига сабаб бўлган материал ўчириб ташланмагунича давом этишини уқтирган.
“Азаттиқ” бу қарор бекор қилинишини сўраб, судга мурожаат қилган. Март ойида Бишкек маъмурий суди “Азаттиқ Медиа” аризасини рад этган. Май ойида эса Бишкек шаҳар суди бу қарорни ўз кучида қолдирган эди.
“Чегара билмас мухбирлар” халқаро ташкилоти эълон қилган сўз эркинлиги рейтингида Қирғизистон 72-ўриндан 122-ўринга тушиб кетган. Бу минтақа давлатлари орасида энг кескин пасайишдир.
